<br />اِک دن رسولِ پاک نے اصحاب سے کہا<br />دیں مال راہِ حق میں جو ہوں تم میں مالدار<br /><br />ارشاد سن کے فرطِ طرب سے عمر اٹھے<br />اس روز انکے پاس تھے درہم کئی ہزار<br /><br />دل میں یہ کہہ رہے تھے کہ صدیق سے ضرور<br />بڑھ کر رکھے گا آج قدم میرا راہوار<br /><br />لائے غرض کہ مال رسولِ امیں کے پاس<br />ایثار کی ہے دست نگر ابتدائے کار<br /><br />پوچھا حضور وسرورِ عالم نے ، اے عمر !<br />اے وہ کہ جوشِ حق سے ترے دل کو ہے قرار<br /><br />رکھا ہے کچھ عیال کی خاطر بھی تو نے کیا؟<br />مسلم ہے اپنے خویش و اقارب کا حق گذار<br /><br />کی عرض نصف مال ہے فرزند و زن کا حق<br />باقی جو ہے وہ ملتِ بیضا پہ ہے نثار<br /><br />اتنے میں وہ رفیقِ نبوت بھی آگیا<br />جس سے بنائے عشق و محبت ہے استوار<br /><br />لے آیا اپنے ساتھ وہ مردِ وفا سرشت<br />ہر چیز، جس سے چشمِ جہاں میں ہو اعتبار<br /><br />مِلکِ یمین و درہم و دینار و رخت و جنس<br />اسپِ قمر، سم و شتر و قاطر و حمار<br /><br />بولے حضور، چاہئے فکرِ عیال بھی۔<br />کہنے لگا وہ عشق و محبت کا رازدار<br /><br />اے تجھ سے دیدۂ مہ و انجم فروغ گیر<br />اے تیری ذات باعثِ تکوینِ روزگار<br /><br />پروانے کو چراغ ہے ، بلبل کو پھول بس<br />صدیق کے لئے ہے خدا کا رسول بس!<br /><br />صلی اللہ علیہ واٰلہ وسلم<br /><br />علامہ اقبال<br /><br />Iqbal<br />Allama Iqbal<br />Muhammad Shahrukh Qadri<br />#ShahrukhFeroz
